Ginasigurado sang mga opisyal sang Barangay Baybay, Roxas City nga hugot nga ginapatuman ang Anti-Epal Policy nga direktiba sang Department of the Interior and Local Government (DILG) apang indi ini bag-o para sa ila.
Sa interview sang Bombo Radyo kay Punong Barangay Erwin Oroceo, iya ginpahayag nga may yara na sadto pa lang sang Executive Order No.1 si Mayor Ronnie Dadivas nga nagadumili sang nawong kag pangalan sang mga pulitiko ukon public officials sa mga programa kag proyekto sang gobyerno gani mahapos na lang nga himuon ang direktiba sang DILG.
Suno kay Oroceo, pabor siya sa amo nga polisa agud indi man mangin mahigko tulukon ang mga dalanon bangud masami nawong sang pulitiko ang makit-an sang tawo.
Pahayag sang punong barangay, siya mismo ang magapanguna sa pagsunod sa Anti-Epal Policy sa Barangay Baybay agud nga masunod man ini sang iban.
Nahibaluan nga padayon nga naga-monitor ang Department of the Interior and Local Government (DILG) Region 6 sa mga Local Government Units (LGU) kaangut sa ginamandu nga pagpatuman sang Anti-Epal Policy.
