Alerto sa karon ang pamunuan sang Barangay Punta Tabuc, sining syudad matapos ginaalegar kaupod sang COVID-19 positive nga nagpalagyo sa Hortus Botanicus nga si Santos Manican ang kahagugma nga si Renalyn.
Ginpahayag ni Barangay Kapitan Nestor Buenviaje nga padayon man ang ila monitoring kag koordinasyon sa pamilya ni Renalyn nga residente sang Barangay Punta Tabuc agud makahatag sa ila sang impormasyon sa ensakto nga lokasyon nga ginapahamtangan sini.
Suno sa opisyal matapos nabuyagyag nga may nakakita kay Santos nga ginsugat si Renalyn sa Barangay Punta Tabuc, gilayon nila nga ginpadulungan ang balay sang dalaga agud kumpirmahon ang report.
Nagpadulong man sa Barangay Tanza ang grupo ni Buenviaje matapos gintuad sang iloy ni Renalyn nga yara ini sa nasambit nga lugar kag ginbuligan ni certain Philip.
Wala ang presensiya sang dalaga apang ila na-estorya si Philip nga nagsiling naghatag sang P100 kay Renalyn para may makaon ini.
Apang ginsiling ni Philip nga nagaisahanon lamang ang dalaga sang iya nakita.
Ginkadtuan man nila ang Barangay Tiza kag iban pa nga lugar nga ginapatihan posible ginteniran ni Renalyn apang wala nila ini makita.
Ginpanindugan ni Buenviaje nga nagabuligay sila sang mga kaupdanan para makita si Renalyn agud mapahamtang ini sa quarantine facility bangud na-exposed na ini kay Santos nga isa ka COVID-19 positive.
Nagpangabay man ini sa sin-o nga pamilya ukon masamputan nga balay ni Renalyn nga ginlaragway sini nga maniwang, maputi kag blonde ang buhok nga gilayon magpakig-angut sa ila ukon sa COVID-19 Task Force bangud indi tiliawan nga balatian ang dala ni Santos nga ginasiling kaupod ni Renalyn.
Nagpanwagan man si Kapitan Buenviaje sa duha kun mahimo magpakita na lamang sila kag indi na magpanago bangud delikado ang balatian nga COVID-19 kag posible nga tunaan pa ini sang kamatayon.
Nauna diri nasiplatan man ang duha sa Barangay Culasi kag nagsakay pa sa tricycle.
Nahibaluan nga sa karon naka-high alert ang COVID-19 Task Force nga gintukod sang gobyerno sang syudad matapos nakapalagyo si Santos.
