WASHINGTON D.C., USA – Nagapadayon sa gihapon ang maid-id nga imbestigasyon sang mga otoridad may kaangtanan sa nagluntad nga aksidente nga pagbungguanay sa kahawaan sang American Eagle Flight 5342 kag Military helicopter malapit sa Reagan Washington National Airport sa US.
Sa interview sang Bombo Radyo kay Bombo International Correspondent Mr. Arthur Pequirda Bulacan, indi pa maathag sa karon kun ano ang gintunaan sang nasambit nga aksidente sa kahawaan apang madamo suno diri sang ginalantaw nga anggulo ang mga otoridad.
Isa na diri sa mga ginalantaw nga anggulo ang indi normal kag madasig nga paglupad sang Black Hawk helicopter kag hinali lang ini nga nagtuhaw kag nakabunggo sa maga-landing kuntani nga American Airlines.
Suno pa kay Mr. Bulacan nga ginalantaw man nga anggulo amu ang traffic controling issue bangud crodwded ang area kag madamo ang naga-landing nga flights kag military planes.
Dugang pa sini nga wala man ginadula nga posibilidad sang mga otoridad ang anggulo nga lain ang frequency sang Black Hawk helicopter amu nga wala sini makuha ang message kag nangin rason sang pagbungguanay.
Matadaan nga una na nga ginkumpirmar ni US President Donald Trump nga wala sang survivor sa makahalangusbo nga plane crash nga nag-utas sang kabug-usan nga 67 ka persona.
Bangud sa natabo nga aksidente sa kahawaan, may ginahimo na suno diri nga tikang ang gobyerno sang US agud malikawan ang kaangay nga insidente.
