SEOUL, SOUTH KOREA – Nagpasaka sang criminal charges ang pamilya sang mga biktima sang aksidente sa eroplano sa South Korea batok sa chief executive officer sang Jeju Air, transport minister kag masobra 10 ka iban pa.
Ginapanindugan nila nga may daku nga kapabayaan nga gintunaan sang trahedya.
Indi magnubo sa 72 ka mga himata sang mga biktima ang nagapanawagan sang mas madalom nga imbestigasyon sa natabu sa eroplano nga nagpatay sa 179 ka mga sakay.
Ginapanindugan nila nga indi lamang aksidente ang natabo nga trahedya kundi isa ka daku nga kalamidad tuga sang kapaslawan sang tagdumalahan.
Halos Lima na ka bulan apang ginahibalo pa sang mga otoridad ang gintunaan sang pagkahulog sang eroplano sa Muan International Airport.
Nahibaluan nga nagpatigayon na sang criminal investigation ang kapulisan antes ang pinakaulihi nga reklamo sang mga himata sang mga biktima.
Sa karon, ginadumilian ang CEO sang Jeju Air nga si Kim E-bae nga maghalin sa pungsod, bisan pa nga wala pa sang desisyon sa iya kaso.
