Gintawag ni Senate President Francis “Chiz” G. Escudero nga mapintas ang na-report nga plano sang Estados Unidos nga ipa-deport sa Libya ang mga Asian immigrant, kalakip ang mga Pilipino.
Ginkondinar ini sang nagkalain-lain nga pungsod kag mga human rights advocate ang nasambit nga plano ni US President Donald Trump nga kabahin sang iya nga campaign promise sa mga pumuluyo sang Amerika.
Nahibaluan nga temporaryo nga ginpauntat sang US judge ang deportation proceedings sang mga Asian immigrants kalakip na ang mga Pilipino.
Suno kay Judge Brian Murphy sang Massachusetts, ang pag-deport sang administrasyon ni Trump sa mga imigrante sa Libya ang isa ka paglapas sa court order nga iya ginpaguwa sadtong Marso.
Ginapahayag nga ang Libya may ara sang history nga mapintas sa mga detainees.
Panawagan ni Escudero kay Philippine Ambassador to the US Jose Manuel Romualdez nga usisaon ang kahimtangan sang tanan nga mga Pilipino nga natalana i-deport ukon isaylo sa iban nga mga estado kag palaparon pa ang legal nga bulig kun kinahanglanon.
Ginpasiguro man ni Escudero nga kun luyag sang Estados Unidos nga i-deport ang mga Pinoy nga may problema sa immigration, nakahanda ang Pilipinas nga batunon ang mga ini.
