Ginbuksan sang Japan International Corp. of Welfare Services (JICWELS) kag Department of Migrant Workers (DMW) ang recruitment para sa candidate nurses kag certified care workers sa idalum sang Japan-Philippines Economic Partnership Agreement.
Sa isa ka news release, ginsiling sandg Japanese Embassy sa Manila nagabaton ang JICWELS kag DMW sang applications para sa 50 nga mga nurses (Kangoshi) positions kag 300 nga mga care workers (Kaigofukushishi) positions.
Ang mga mabaton nga kandidato, magapaidalum sa Japanese language training sa sulod sang anum ka bulan sa Pilipinas kag anum naman ka bulan sa Japan.
Ang training, wala sang bayad, apang kinahanglan nga tapuson antes ang tatlo tubtob apat ka tuig nga work term sa Japanese hospitals kag caregiving facilities.
Ang mga kandidato, hatagan man sang daily living allowance para sa bilog nga panahon sang language training.
Ginaganyat man ang mga ini nga magkuha sang Japanese license para sa Kangoshi kag Kaigofukushishi agud mag-angkon sang oportunidad para sa mas malawig nga employment term sa Japan.
Matandaan nga sadtong Disyembre 2024, ginsiling sang
local media nga aktibo nga igaduso sang Health, Labor and Welfare Ministry sang Tokyo ang pagpangita sang nurses kag care workers nagikan sa Southeast Asia sumugod 2025 bangud mas madamo sang tigulang ang ginalauman nga magakinahanglan sang pag-atipan sa tunga sang nagadako nga aging society sang Japan.
Isa sa kada lima nga Japanese mangin 75-anyos pataas sa 2025.
Sadtong 2024, may 2.15 million nga mga nursing care workers ang yara sa Japan apang ginabulubanta nga mag-angkon sang shortage nga 250,000 workers sa 2026 kag 570,000 naman sa 2040.
Ang mga interesado nga applicant mahimo lamang nga magsumite sang ila mga applications online antes ang ang Abril 4, 2025.
