ROXAS CITY – Ginpatpat sang contractor ang rason sang pagka-atrasar sang ginaubra nga karsada sa Brgy. Punta Tabuc, Roxas City.
Sa interview sang Bombo Radyo kay Mr. Roy De Leon, Operations Manager sang JGC Construction nga amo ang contractor nga nagaimplementar sang proyekto, ginpahayag sini nga magluwas sang malain nga tyempo bangud sa pag-inulan, delay man ang ila pagsugod sa nasambit nga project sa natalana nga schedule.
Gintuad ni Mr. De Leon nga nasuguran kun tani sang Marso 26 kag magatapos sang Mayo 15 sini nga tuig ang pag-implementar sang proyekto kun naumpisahan ini sa nasambit nga petsa.
Apang bilang konsiderasyon sa hinyo sang City Government nga patapuson anay ang Capiztahan bangud madamo sang mga aktibidades sa syudad, ginhinyo man nila sa DPWH nga sayluhon ang schedule sang pag-umpisa sang rehabilitasyon sang karsada sa nasambit nga barangay kag gin-move ini sang Mayo 15 kag magatakop sa Hulyo 15.
Dugang pa sini nga rason amu ang indi sila makadali-dali operate bangud sa mga linya sang TELCO kag tubig nga maigo.
Aminado man ini nga indi pa nila matapos ang pag-ubra sa natalana nga deadline nga Hulyo 15 kun tayuyon sa gihapon ang pag-inulan. Pahayag pa sini nga ang amu nga karsada ang konkreto kag may ginahulat nga curing period antes gamiton para sa mga salakyan.
Suno pa kay De Leon nga ginatinguhaan gid nila nga matapos ang trabaho kag bisan sila ang nagakaapektuhan man sang pagpugok sang trapiko bangud indi makadali-dali sulod ang ila mga equipment para magbuhos.
Panawagan sini sa publiko nga gamay lang nga pasensya kag kooperasyon pinaagi sa pagsunod sa mga nagagiya sang trapiko ukon traffic enforcer.
Nahibaluan nga ang amu nga proyekto ang congressional project sang Department of Public Work and Highways.
