Isa ka robotics industry sang Iran ang nabisto nga ang duha ka “advanced humanoid robots” nga ginpasundayag sa kakatapos lang nga Kish Inox Tech Expo ang mga matuod nga tao lang gali nga nakasuksok sang robot costume.
Sa mga nagalapta nga video, makit-an ang isa ka lalaki kag babaye nga “robot” nga nakasuksok sang silver costumes nga may nakasulat nga binary code (mga numero nga 0 kag 1).
Sa isa ka clip, nagpakilala pa ang babaye bilang “Miss Data” kag ginsiling na nagapuyo siya sa “blockchain space.”
Gin-esplikar pa sini sa isa ka dumulu-ong nga siya kag ang iya nga partner ang isa ka “koleksiyon sang datos nga nagabuligay sa isa ka shared data code.”
Apang sa pihak sini, kita sa gihapon sa mga high-definition videos ang ila nga hulag-tawo.
Halata ang ila nga acne scars, ang natural nga pagpamisok sang mata, kag ang pagkuba-kuba sang dughan.
Bangud sa kahuy-anan nga naangkon, gilayon nga nagpanginwala ang Iran. Gin-atahag ni Hossein Afshin, isa ka opisyal sa Science and Technology sang Iran, nga wala sila sang kahilabtanan sa nasambit nga hitabo.
Dugang pa nila, istratehiya lang ini sang isa ka pribado nga kompanya para sa advertising kag indi ini ang opisyal nga representasyon sang teknolohiya sang pungsod.
