Ginklaro sang Department of Justice nga wala pa makumpirmar sang departamento kun matuod nga tul-an sang tawo ang narekober sa Taal Lake area.
Suno kay Justice Assistant Secretary kag Spokesperson Mico Clavano, posible nga indi tul-an sang tawo ang unod sang mga sako nga nasapwan kag narekober sang Philippine National Police kag Philippine Coast Guard.
Kasunod ini sang paglunsar sang search and retrieval operations sang nasambit nga departamento sa Taal Lake agud pangitaon ang ginaalegar bangkay sang mga missing sabungero.
Ginpahayag sang nasambit nga spokesperson nga ginalikawan sang Department of Justice ang pagpataas sang ila ‘expectations’ bangud indi lubos nga sigurado kon ano ang unod sang mga sako nga narekober.
Apang nagalaum suno sa iya ang departamento nga ginahimo sang Philippine Coast Guard ang tanan nga ila masarangan para sa operasyon nga gin-umpisahan angut sa kaso sang mga missing sabungero.
Madumduman nga ginpatigayon ang dive sa isa ka bahin sang Taal lake matapos ginbuyagyag sang isa ka witness nga didto ginaalegar ginhaboy ang mga nadula nga sabungero.
Partikular nga ginbuyagyag ni alyas ‘Totoy’ ukon Julie ‘Dondon’ Patidongan, sang damlag lang nga ginpahayag ginlubong ang mga biktima sa nasambit nga lokasyon ukon linaw.
Suno sa departamento nagpadala na sang mga tinawo gikan sa National Bureau of Investigation kag mga piskal nga mangin ‘witness’ sa ginapatigayon nga search and rescue operation.
Samtang wala pa sang kumpirmasyon kun bala may mga tul-an sang tawo ang mga narekober nga sako, ginpakigbahin man ni Justice Spokesperson Clavano nga posible magdugay pa sang isa tubtub duha ka adlaw antes ini madeterminar sa forensic examination nga pagahimuon.
