Naglain suno ang buot sang 11 ukon 12 ka mga senador matapos nga ginbalewala ang ila apela sa caucus nga dugangan ang pondo sang Office of the Vice President (OVP) para sa 2025, suno kay Senadora Imee Marcos.
Ginsambit lamang ni Marcos nga mga pangalan nanday Senators Ronald “Bato” dela Rosa, Christopher “Bong’ Go, Robinhood Padilla kag Villar apang naglab-ot suno sa isa ka dosena nga mga senador ang malain ang buot.
Ginkwestiyon suno ni Marcos sa caucus kun ngaman indi pagdugangan ang budget sang OVP apang ang pahayag suno sa meeting wala nagpangayo ang opisina sang bise sang dugang nga pondo.
Ginsabat naman ni Marcos ang ginpahayag ni Senate Committee on Finance Chairman Senadora Grace Poe nga capacitated ukon may kapasidad ang OVP nga makatrabaho sa P733 million nga pondo para sa 2025.
Pahayag pa sang senadora, indi matabu nga bastante ang pondo ilabi na kag madamu sang masisante nga mga empleyado sa OVP kag magsara man ang mga regional kag provincial offices.
