Opisyal nga ginproklamar kahapon nga adlaw, Sabado, Mayo 17 ang mga Senador nga nagdaug sa Mayo 12 national kag local elections.
Ginpangunahan sang Commission on Elections ang proklamasyon sang 12 ka mga Senador, apang wala makatambong si Senator Kiko Pangilinan bangud nga nagtambong ini sa graduation sang iya anak sa Amerika.
Sa tion sang seremonya, ginhatagan sang kahigayunan ang tagsa ka Senador nga makahatag sang pila ka minutos nga mensahe.
Samtang, gindayaw man ni Comelec Chairman George Erwin Garcia ang maayo nga turnout sa nasambit nga eleksyon. Suno kay Garcia, ang turnout nga naglab-ot sa masobra 82% ang makabig nga pinakadaku nga turnout sa maragtas sang pungsod.
Ginpasalamatan man ni Garcia ang mga pamatan-on nga botante sa ila partisipasyon kag aktibo nga partisipasyon sa nakaligad nga eleksyon.
Ginhatagan pagtamod sang Comelec chair nga ang suporta nga ginapakita sang mga pamatan-on, ilabi na ang ila daku nga porsyento, isa ka mayor nga factor sa pagdikta kon sin-o ang masunod nga mga lider sang pungsod.
Apisar suno sa iya nga indi perpekto ang 2025 elections, nalipay ang opisyal nga sa kabilugan wala sang dalagko nga isyu ukon problema ang ginpatigayon nga eleksyon.
Sa katapusan sang mensahe sang Comelec Chairman antes ang pormal nga proklamasyon, nagbilin ini sang panawagan sa mga Senador para sa reporma kag pagpauswag sa masunod nga eleksyon.
