ROXAS CITY – Kadungan sa selebrasyon sang Kidney Month, ginpaathag sang non-Communicable diseases coordinator sang Capiz Provincial Health Office (PHO) ang pila ka mga sintomas sang sakit sa kidney.
Sa interview sang Bombo Radyo kay Mr. Jeiel Mark Tumlos Ledesma, RN ginpahayag sini nga nagasugod nga maka-angkon ang isa ka indibidwal sang sakit sa kidney pag-abot sa edad nga 20-anyos bangud diri nagasugod ang mga indi maayo nga pag-atipan sa ikaayong lawas kag pagsugod man sa pagtesting kag pagsulod sa pila ka mga bisyo.
Suno kay Ledesma, may yara sang kaso nga bata pa lamang may yara na ini nga sakit sa kidney magluwas na lamang kun mabaskog ang immune system sini.
Ginpatpat man sini ang pila ka mga sintomas sa tion nga may yara sang sintomas sa kidney stone ang isa ka indibidwal;
*makabatyag sang pagpalanakit sa likod
*sakit sa tyan paidalum sa may bahin sang kinatawo
*nagapinkish ang ihi
*masako ang pag-ihi nga nagadugay lamang sang 3 ka segundo
Yari naman ang pila ka mga sintomas nga may yara sang Kidney Diseases ang isa ka indibidwal;
*masami nga lutoy
*nabudlayan nga makatulog (Insomia)
*dry skin
*may dugo kag nagabula ang ihi
*nagamanas ang mata ka gang bahin sang tiil
Bangud sini, ginpanugyanan ni Ledesma ang publiko nga buhinan ang pagkaon sang mga maalat nga pagkaon, karne sa baylo mas maayo nga magkaon na lamang sang isda.
Mahibaluan nga ba-se sa datos sang Capiz Provincial Health Office may yara na sang 51 nga kaso ang may yara sang sakit sa kidney kag nagapa-idalum sa dialysis.
Pananglitan nga ang isa ka indibidwal ginapaidalum na sa dialysis, indi suno diri kinahanglan nga magkahadlok bangud may yara sang mga kaso nga naga-ayo ang isa ka pasyente, apang nakadepende ini suno diri kun paano buligan sang pasyente ang iya kaugalingon.
Ginklaro man ni Ledesma nga mahimo sa gihapon nga magkabuhi sang normal ang mga tawo nga isa na lamang ang ila kidney kag mahimo sa gihapon sila suno diri nga maka-angkon sang bata.
Panugyan sini sa tanan nga mga may yara sang nabatayagan nga pila ka mga sintomas, gilayon nga magpadulong sa doktor agud madapatan sang nagakaigo nga pagbulong.
