Mga soldado sang 3rd Infantry Division, magapabilin anay sa Cebu samtang indi pa matapos sang Search and Rescue Operations

ROXAS CITY, CAPIZ- Magapabilin anay sa Cebu ang mga katapo sang 3^rd Infantry Division nagikan sa Capiz, samtang nagapadayon ang search and retrieval operations para sa mga biktima sang 6.9 magnitude nga linog nga nagtay-og partikular sa City of Bogo, kag mga kaiping nga probinsya sang Setyembre 30, 2025.

Sa interview sang Bombo Radyo kay Captain Jessie Jun Ebalan, Chief sang 3^rd Infantry Division Public Affairs Office, iya ginpahayag nga tubtob wala pa sang mando nagikan sa mga natungdan, magapabilin ang grupo sa lugar agud nga magbulig sa mga operasyon kag siguruhon ang koordinasyon sang mga ahensya nga nagapatigayon sang relief kag rescue operations.

Suno kay Ebalan, may yara sang masobra 60 ka mga soldado ang gin-deploy padulong sa amo nga lugar.

Pahayag pa nya, may yara man sang mga naka-standby nga mga soldado, pananglitan nga magkinahanglan pagid madasig nga makahatag sang bulig ang probinsya.

Dugang pa sang natungdan, padayon nga naga-ugyon ang lokal nga gobyerno kag mga residente sang Capiz sa pagpangamuyo para sa kaluasan sang mga apektado sang linog, kag sa kadalag-an sang mga ginapatigayon nga operasyon.

Interviewed by Bombo Sunnie Mae Constantino Batencila