Ginbuyagyag ni House appropriations panel vice chair kag Batangas Rep. Leandro Leviste nga pila ka mga katapo sang team ni Department of Public Works and Highways (DPWH) Secretary Vince Dizon ang mga kontraktor ukon may koneksyon sa mga kontraktor nga involved sa flood control anomaly.
Suno kay Rep. Leviste, nakuha niya ang impormasyon sa pila ka mga kaupod sa Kamara.
Suno sa iya, indi mismo si Secretary Dizon ang nagkontraktor, kundi ang iya mga tinawo.
Pahayag pa niya, madamo na sa Kongreso ang nakahibalo sini.
Ginhingyo sini kay Dizon nga ipahibalo sa publiko ang koneksyon sang iya hubon sa mga kontraktor, ilabi na nga ginapatigayon ang imbestigasyon sa iregular nga mga proyekto sang gobyerno.
Dugang pa ni Leviste, sa simple nga pagpangita sa online, matukiban ang mga alegasyon sang korapsyon batok sa pila ka mga bag-o nga appointees sang DPWH.
May potensyal suno sa iya si Dizon nga magdala sang reporma sa DPWH kon bukas siya sa sini nga isyu.
Sa tunga-tunga sang press conference, nakabaton sang tawag si Leviste gikan sa mataas nga opisyal sang DPWH.
Ginpanindugan sang Kongresista nga ang iya luyag amo ang transparency kag patas nga alokasyon sang pondo. Kon may koneksyon sa mga kontraktor, tani ma-disclose ini sa publiko.
