ROXAS CITY – Ginalimitahan sang COMELEC ang mga supporters nga magaupod sa kandidato sa tion sang filing sang Certificate of Candidacy.
Sa interview sang Bombo Radyo kay COMELEC-Capiz Election Supervisor Atty. Wil Arceño, ginpahayag sini nga seguridad sang naga-file nga kandidato ang ila nagapanguna nga concern rason nga gina-limit lamang ang mga supporters nga maga-upod kag duha lang ang dapat nga mag-assist sa sulod sang talatapan.
Suno kay Arceño nga ginalikawan nga magdamo ang mga supporter sang kandidato bangud sa posible nga pagsinggitanay.
Pangabay pa sini nga kun mahimo indi dapat magdungan ang mga grupo sang kandidato agud malikawan ang ano man nga posible matabo nga tensyon.
Panugyan man sini sa mga maga-file nga dapat kumpleto na ang mga kinahanglanon nga dokumento kag dapat original antes magpadulong sa venue.
Mahibaluan nga magasugod ang filing sang COC sa Oktubre 1, 2024 kag magatakop sa Oktubre 8, 2024.
