ROXAS CITY – Nakilan-an na sang katapo sang Pontevedra PNP ang posible mga suspetsado sa pagluthang-patay kay Kapitan Frederick ‘dikoy’ Dullano sa banwa sang Pontevedra.
Sa interview sang Bombo Radyo kay PMaj. Cyril Punzalan, Hepe sang Pontevedra PNP, ginsiling sini nga daku ang nabulig sang ila natipon nga mga CCTV footage kag iban pa nga ebidensya bangud ila na-trace ang naghimo sang krimen kun sa diin positibo nga ginkilala sang mga witnesses.
Apang, ginpahayag sang Hepe nga indi pa mahimo iwaragwag sa kahanginan ang mga pangalan sini bangud padayon pa ang ila imbestigasyon angut sa insidente.
Suno diri, taga-Capiz ang mga suspetsado kag tubtob sa karon padayon pa ang ila paglalip sa mga ini kag yara pa sila sa hot pursuit.
May yara sang 3 ka anggulo nga ginalantaw ang kapulisan sa posible motibo sang mga suspek.
Dugang diri, ginmanduan man ni Mayor Tumlos ang kapulisan nga indi mag-untat tubtob indi madakpan ang mga suspek kag posible madugangan pa ang gintanyag nga reward money agud gilayon makit-an ang mga ini kag mapasakaan sang nagakaigo nga kaso.
Gapasalamat si Punzalan sa mga pumuluyo nga nagahatag impormasyon kag nagakooperar sa ila angut sa krimen.
Nagapasalig ini nga ang Pontevedra PNP wala nagauntat sa pag-aksyon sa mga krimen kasubong sa nasambit nga insidente.
