Gin-athag sang Department of Social Welfare and Development (DSWD) nga bukas ang Assistance to Individuals in Crisis Situations (AICS) program sang ahensya para sa tanan , indi lang para sa mga pigado kundi mangin sa mga “middle class.”
Suno kay DSWD Crisis Intervention Program Director Edwin Morata , wala sang may ginapili nga estado sang kabuhi ang ginatawag nga “shocks” ukon ang wala ginalauman nga sitwasyon kaangay sang kalamidad ukon energy emergency.
Suno sa DSWD, padayon nila nga gina-improve ang mga polisa sang AICS agud masolbar ang nagabag-o nga kinahanglanon sang nagkalain-lain nga kliyente.
Ang AICS ang isa ka social welfare service nga nagahatag sang bulig para sa galastuhon sa medical, pagpalubong, transportasyon, edukasyon, pagkaon kag iban pa nga financial assistance.
Pahayag niya, mas ginpasimple sang ahensya ang proseso sang aplikasyon para sa AICS.
Sa subong, tatlo lang ang pamaagi nga kinahanglan sang aplikante:
- Pagkuha sang numero ukon pag-queue
- Assessment kag interview
- Pag-release sang bulig
Para sa mga documentary requirements, kinahanglan magpasa ang aplikante sang mga masunod:
- Valid ID sang claimant kag;
- Medical certificate, medical abstract, ukon sertipaksyon halin sa psychiatrist ukon psychologist
Depende sa ginapangayo nga bulig, kinahanglan man nga magpasa sang dugang nga dokumento bilang suporta sa aplikasyon:
- Para sa laboratory ukon dioagnostic procedures, kag mga kinahanglan para sa medical implants ukon assistive devices – request para sa laboratory ukon diagnostic procedure nga may price quotation.
- Para sa mga pasyente nga nagapaidalom sa therapy ukon espesyal nga pagbulong – doctor’s order ukon treatment protocol nga may price quotation
- Para sa kinahanglan nga bulong – reseta sang bulong
- Para sa bulog sa hospital bill – statement of account
