Ginsuguran na nga ipa-deport ang mga naka-detain nga migrants gikan sa Amerika sakay sang US military C-17 aircraft sandig sa mandu ni US President Donald Trump sang Biyernes, oras sa Amerika.
Gindala ang tig-80 ka migrants nga sakay sang duha ka US military aircraft padulong sa Guatemala suno sa isa ka US official.
Ginbuyagyag naman sang US State Department nga committed ang Guatemala kag US nga matapos na ang illegal migration kag pabaskugon pa ang border security.
Sang tinalikdan nga mga tinuig, gingamit man ang nasambit nga US military aircraft sa pag-relocate sa mga indibidwal gikan sa isa ka pungsod padulong sa iban nga mga pungsod kaangay sadtong mag-withdraw ang US gikan sa Afghanistan sang 2021.
Ini naman ang una nga kahigayunan nga gingamit ang US military aircraft sa pagdala sang migrants paguwa sang US.
Matandaan nga sa una nga adlaw pa lang sang pagpungko ni Trump sa pwesto, gindeklarar sini ang illegal immigration bilang national emergency kag ginmanduan ang US military nga dugangan ang border security, pag-isyu sang lapnagon nga ban ukon pagbawal sa paghatag sang asylum kag restriksiyon sa citizenship sang mga kabataan nga ginbun-ag sa Amerika.
