Kontrolado na sang mga Syrian rebels ang kapitolyo sang Syria, (Damascus)kahapon nga adlaw sang Dominggo, Disyembre 8, ini matapos nga kumpirmahon sang Syrian opposition fighters ang pagsakop diri nga amu man ang rason sang pagbiya ni Syrian President Bashar al-Assad sa pungsod.
Kaangut sini ginpahayag ni Syrian Observatory for Human Rights, Rami Abdel Rahman nga una na nga nagbiya sa Syria si Assad padulong sa Damascus international airport antes pa man abandunahon sang mga army security forces sini ang lugar.
Suno naman sa duha ka Senior Syrian army officers nga ang paghalin ni Assad ang indi pa nila matumod.
Ginakabig naman sang grupo nga Islamist Hayat Tahrir al-Sham (HTS) nga daku ini nga kadalag-an sa ila nga mga ginapakigbato apisar nga ginapanginwala ini sang gobyerno sang Syria.
Sa pihak nga bahin, ginpahayag ni Prime Minister Mohammed al-Jalali nga handa siya nga makig-cooperate kun sin-o ang bag-o nga ibutang nga lider sang mga pumuluyo.
Dugang pa sini, may mga report nga nagapakita sang nagalala nga kakulangan sang kasiguruhan sa rehiyon. Apisar una nga ginpanginwala sang gobyerno ni Assad ang pag-isol sang ila mga pwersa, may mga senyales na ang Syrian army nga mag-atras gikan sa ila lugar sa palibot sang Damascus.
Ang Damascus ang may populasyon sang masobra 2.503 milion nga tawo nga may kalayuon nga 310 kilometers sa syudad sang Aleppo.
Suno kay Rahman ang pagbukas sang kilala nga Sednaya prison, kun sa diin ginpriso ang linibo nga mga detainaee sa idalom sang pagdumala ni Assad, ang isa ka senyales sang pagbag-o sa rehimen sini.
Madugay na nga nangin simbolo sang tuman nga pagpang-abuso sang gobyerno ang Sednaya, gani ang tikang nga ini ang posible nga nagpabutyag sang lapnagon nga pagbag-o sa lugar.
Dugang pa sini, ang Hezbollah, nga isa nagapanguna nga kaalyado sang militar ni Assad, ang na-report nga ginbayaan na ang mga strategies areas kasubong sa palibot sang syudad sang Damascus kag Homs, nga ang pila sa ila nga mga tropa ang ginpili nga mag pa-redeploy sa iban pa nga mga rehiyon sa Syria ukon magbalik na lamang sa Lebanon.
Ang pag-isol sang Hezbollah ang mahimo nga nagpahina pa sa posisyon ni Assad, bangud sa importante nga suporta sang militar nga ginahatag sang grupo sa gobyerno sang Syria sa mga nakaligad nga tuig.
