ROXAS CITY – Hugot nga ginpanginwala ni 3rd Infantry Division Philippine Army Spokesperson Capt. Cenon Pancito III ang alegasyon sang pila ka mga progresibo nga grupo nga ang militar ang yara sa likod sang pag-ambush sa salakyan sang isa ka abogado sa probinsiya sang Capiz.
Sa interview sang Bombo Radyo kay Capt. Pancito, ginpahayag sini nga nagaguwa na mismo sa imbestigasyon sang hanay sang pulisya nga ang kaupod nga kliyente ni Atty. Heredia ang posible target sang riding-in-tandem nga nagpaulan sang bala sa salakyan sang abogado.
Suno sa iya indi na apektado ang ila nga hanay sa mga alegasyon sang mga rebelde nga grupo bangud halos tanan nga patyanay sa pungsod ang ginaangut sang mga ini sa militar apang indi man sang mga ini mapamatud-an.
Wala man suno sa iya sang dapat nga kahadlukan ang kapareho ni Atty. Heredia sa militar bangud indi man ini sang armado nga personalidad.
Indi naman suno sa iya mabilog sang progresibo nga grupo ang paminsaron sang tawo pinaagi sa ila mga protesta bangud wala naman halos sang may nagapati sa ila nga ideolohiya.
Sa pagkamatuod suno sa opisyal, ‘ginlangaw’ lamang ang protesta sang magkatuhay nga mga progresibo nga grupo kun sa diin ginabasol sang mga ini ang natabo nga pag-ambush kay Heredia sa militar.
Sa karon suno sa opisyal, nakatutok ang ila hanay sa pagpapas sa rebelde nga Communist Party of the Philippines-New Peoples’ Army (CPP-NPA).
