Nagpahamtang sang dugang nga pwersa sang militar sa Barangay Buri, banwa sang Tapaz agud ma-contain ang sitwasyon kasunod sang nagluntad nga engkwentro sa tuga sang 31st Division Reconnaisance Company-Philippine Army kag mga rebelde nga grupo sa Sitio Tabiay sa nasambit nga barangay.
Ginpahayag ni Army Major Cenon Pancito III, spokesman sang 3rd Infantry Division Philippine Army nga ginpasangkad pa sang militar ang hot pursuit operation batuk sa mga nagwithdraw nga mga rebelde kag nagpahamtang sang mga checkpoint sa lugar.
Suno sa opisyal nga nagluntad ang engkwentro matapos may pila ka mga concerned nga indibidwal nga nagpalab-ot sang impormasyon sa militar nga sadto nga tion nagapatigayon sang combat operation angut sa presensiya sang mga armado nga kalalakinhan sa lugar.
Nasumalang sang tropa sang gobyerno ang kapin sa 15 ka mga miyembro sang Communist Party of Philippines – New People’s Army (CPP-NPA) kag nagbayluhanay sang luthang ang magtimbang nga bahin.
Narekober sang militar ang pila ka mga pagkabutang nga ginbilin sang mga rebelde sa ila pagpalagyo kapareho sang (1) ka Improvised Explosive Device (IED), teleskopyo,; (1) container sang abono; (1) ka sako sang bugas; (5) ka litro nga gasolina; (3) ka bilog nga jungle bolo; (6) ka kilo nga karne sang baboy; (4) ka bilog nga flashlight; (6) ka bilog nga duyan, (9) ka bilog nga backpack; (2) ka mga stove; (2) ka kilo nga tobako; Groceries; 150 metros nga electrical wire, materyales sa paghimo sang landmines; personal nga kagamitan, subersibo nga dokumento.
Ginpahayag ni Pancito nga ang nakita nga mga materyales sa paghimo sang landmines, klaro nga paglapas sa international humanitarian law.
Samtang ginapanindugan sang opisyal nga padayon ang ila pagpakigbato sa insurhensiya bangud katuyuan sang gobyerno nga mangin malinong kag matawhay ang Pilipinas kag madula na ang nagahatag sang kakugmat sa mga pumuluyo.
