ROXAS CITY – Ginkumpirmar sang tagdumalahan sang Department of Labor and Employment (DOLE)-Capiz nga nagpadala na ang ila nga central office sang proposal sa Malakanyang angut sa posible minimum wage increase kag wage subsidy sa mga trabahante.
Ini ang ginpahayag ni Ms. Amy Judicpa sang DOLE-Capiz, sang mainterview sang Bombo Radyo.
Dugang pa sini nga ginapamatian sang ila talatapan ang panawagan sang mga trabahante angut sa epekto sang pagtinaas sang presyohanay sang gatong kag pagsaka sang mga presyo sang balaklon, nga indi na maka-igo ang ila ginakita nga minimum wage sa mga probinsya sa pungsod.
Sa pihak nga bahin, ginpahayag ni Judicpa nga nag-propose man ang National Economic and Development Authority (NEDA) sang 4 days in a week nga work arrangements, kun sa diin pagahimuon nga 10-oras sa isa ka adlaw sa apat ka beses kada semana nga pagsulod sa trabaho, apang nakadepende ini nga work arrangements sa employer. Ginklaro sang DOLE-Capiz nga tanan ini ang proposals pagid lamang sa Presidente kag ginalauman nga makakuha sang sabat sa masunod nga mga semana.
