ROXAS CITY – Ginpasakaan na sang nagakaigo nga kaso sang misis ang mister kag ang iya nga kerida nga nadakpan sa akto nga nagapakighilawas sa sulod sang ila balay sa banwa sang Ivisan, Capiz.
Kaso nga concubinage ang ginpasaka ni alyas May sa mister sini nga si alyas Tibor kag kerida nga si alyas Inday nga pirmado ni Judge Ramcez John Honrado sang 3rd MCTC, Dao-Ivisan.
Matandaan nga nag-angkon sang pilas sa ulo kag abaga ang mister kag na-confine pa sa ospital matapos ginlampusan sang bote sang iya misis kasunod sang pagkadakop sa iya nga kaupod ang kerida kag wala sang suksok nga panapot sa sulod sang hulot.
Mahibaluan nga nagpauli si alyas May sa ila balay agud magkuha sang telebisyon apang ginkakibot sini sang nakit-an nga naka-park ang motorsiklo ni alyas Inday sa guwa sang ila balay.
Nagtuyo pa kuntani nga magpalagyo si alyas Inday apang ginpunggan ini sang anak ni alyas May.
Mahibaluan nga aminado si alyas Inday nga may relasyon sila ni alyas Tibor apang nagpanindugan nga nagakaon lamang sila sang naabtan ni alyas May.
