ROXAS CITY – Yara na sa estable nga kundisyon ang ginang nga ginbuno sang iya mister sa ila balay sa Barangay Loctugan, Roxas City, matapos ginpaidalum sa operasyon.
Nagapabilin pa sa ospital si Mrs. Olivia Berbaño 50-anyos samtang nagapaayo kasunod sang madinalag-on nga operasyon sa naangkon nga mga samad sa lawas nga tuga sang pagpangbuno sang bana nga si Rey Berbaño, isa ka fish vendor.
Indi malipod nga matapos ginbuno sang suspek ang asawa, ginbuno man sini ang kaugalingon, rason nga ginpadangat man ini sa ospital.
Nagaguwa sa imbestigasyon sang pulisya nga ginkaakig sang suspek ang wala pagpasulod sa iya sang biktima sa ila nga balay sa pihak sang kagustuhan nga magsulod sa balay.
Bangud diri, pwersa nga ginguba ni Rey ang ila nga pirtahan kag sang makasulod, ginbuno ang asawa nga si Olivia.
Sa pihak sang naangkon nga mga samad, nakaguha pa sa balay ang biktima kag nakapangayo sang bulig sa mga kaingud balay nga nagdala sa iya sa ospital.
Samtang naabtan sang mga pulis sa hulot ang duguan nga suspek nga may pilas sa iya nga tiyan.
Gilayon nga gindala sa ospital ang mister nga ginapatihan ginbuno ang kaugalingon matapos nga bun-on ang asawa.
Nagaguwa nga motibo sa insedente ang away pamilya bangud ginaalegar nga nagaplano na nga magbulagay ang mag-asawa.
Samtang desidido naman ang pamilya nga pasakaan sang nagakaigo nga panumbungon ang mister nga suspek.
