Nakita na ang mangingisda nga nauna ginreport nga missing matapos naglumpat sa ginasakyan nga baroto sa kadagatan nga natung-an sang Barangay Olotayan kag Masbate matapos ginbungguan ang ila baroto sang isa ka barko sang Mayo 8, 2021 sang gab-i.
Ginpahayag ni Philippine Coastguard (PCG) Station Commander –Roxas Joe Luviz Mercurio nga gikan sa Aklan ang tatlo ka mga mangingisda kag nagapangisda sa kadagatan sang Roxas City sang gin-alegar ginbungguan sang wala mahibaluan nga barko.
Suno sa opisyal nga nasapwan sa kalalawran sang Aklan ang biktima nga si Rex Peralta, boat captain sang baroto las 11:40 kaina sang aga.
Matandaan nga matapos ginbungguan sang barko ang baroto sang mga biktima, ginsulod ini sang tubig, apang nagpabilin ang duha ka mga mangingisda nga upod ni Peralta kag nag-uyat lamang sa ila baroto tobtob nag-abot ang bulig nga amo ang nagguyod sa ila pabalik sa Aklan.
