ROXAS CITY – Padayon nga gina-imbestigahan sang kapulisan sa banwa sang Sigma kun sin-o ang yara sa likod sang pagsulod kag pagkawat sa‘’Tabernakulo’’ sang San Pedro Calungsod mission station sa Barangay Mianay, Sigma.
Ginkakibot ni Monsignor Butch Abalayon, kura paroko sang nasambit nga mission station sang madiskubrehan nga medyo nakabukas ang pirtahan sang simbahan kag nakit-an nga ginguba ang padlock gamit ang metal cutter.
Sa pagtsekyar ni Msgr. Abalayon, natukiban sini nga ginkuha ang tabernakulo nga nahamtang sa sentro sang altar.
Kasunod sini nagpalab-ot sang mensahe si Msgr. Cyril Villareal, ang vicar general sang Archdiocese of Capiz nga magapaguwa sang circular letter ang Simbahan.
Ginahinyo man ang tanan nga mga tumuloong katoliko nga mangin vigilante sa tanan nga oras, bangud ikaduha na ini nga insedente sang pagpangawat nga nahinabo sa mga simbahan sa probinsiya sang Capiz.
