Nakuha sang mga kapulisan ang isa ka unit sang armas-luthang kag ginaalegar shabu sa ginpatigayon nga implementasyon sang search warrant sa Barangay Timpas, Panitan, Capiz.
Ginkilala ang nadakpan nga si alyas Joel, 53-anyos kag residente sang nasambit nga barangay.
Narekober sa paghinakop sang suspek ang isa ka unit sang caliber .38 revolver nga loaded sang duha ka mga bala, 10 ka sachets sang ginaalegar shabu kag iban pa drug paraphernalia.
Nahibaluan nga gin-isyu ni Judge Esperanza Isabel Poco-Deslate sang Isabel RTC, 6th Judicial Region, Roxas City, napetsahan Hulyo 15, 2024.
Magapangatubang sa kaso nga paglapas sa Republic Act 9165 ukon Comprehensive Dangerous Drugs Act of 2002 kag RA 10591 ukon Comprehensive Firearms and Ammunition Regulation Act ang nasambit nga suspek.
Sa karon yara na sa paghinakop sang Panitan Municipal Police Station para sa nagakaigo nga disposisyon.
