ROXAS CITY – Karsel ang ginsudlan sang mister kag iya kabit matapos nadakpan ni misis sa isa ka balay sa Barangay Dumolog, Roxas City.
Nagpangayo sang police assistance ang misis nga ginkilala kay Inday nga gikan pa sa Bacolod City bangud madugay na ini nga nagaduda nga may iban nga babaye ang bana nga si Dodoy matapos mismo ginpresentar sini ang kaugalingon nga siya ang magadumala sa ila negosyo sa Roxas City.
Matapos nakumpirma ni Inday nga matood ang balita, gin-aresto ang duha kag ginpreso.
Apang nagkinagamo sa sulod sang police station matapos nagpalapit ang misis sa 26-anyos nga kabit ni mister nga si Nene kag tampaon ini apang hinali nga nagpatunga ang lalaki rason nga ini ang nakatilaw sang tampa sang asawa.
Nagpanindugan naman si Dodoy nga madugay na sila nga nagseparar ni Inday rason nga hilway na sila nga makapangita san tawo nga makapahalipay sa ila.
Matandaan nga nagkakilala sanday Dodoy kag Nene pinaagi sa ila mutual friends nga nakasama nila sa pag-inom.
Indi man lipod kay Dodoy nga may asawa si Nene nga isa ka OFW nga karon yara sa luwas sang pungsod.
