ROXAS CITY – Kaakig ang nabatyagan sang isa ka mister matapos maaktuhan ang misis nga ginatudos ang punggod sa likod sang abyan sa sulod mismo sang ila balay sa banwa sang Cuartero samtang yara sa lamesa ang makahulubog nga ilimnon.
Sa exclusive interview sang Bombo Radyo kay Alyas Toto, isa ka BPAT member, ginpahayag sini nga magapadulong kuntani ini sa Roxas City para magtrabaho sang nagtunog ang cellphone sang asawa.
Sa kuryusidad ginbuksan niya ini kag nakibot sang makita nga ka-text sang asawa ang kaupod nga BPAT member nga si alyas Nonoy kag ginapakadto ini sa ila balay sa gab-i sa diin wala ang mister.
Sa kagustuhan nga madakpan sa akto ang asawa kag abyan, nagpakuno kuno ini nga naglakat para magtrabaho apang wala ini nagkadto sa trabaho sa baylo nagtenir lamang sa banwa kag pagka gab-i ginkibot sini ang duha sang nagbalik siya sa ila balay.
Suno kay Alyas Toto nga kasubong nakakita sang murto ang duha nga naabtan sini nga nagatudsanay sang punggod sa diin nagtuyo pa nga maglumpat si Alyas Nonoy apang ginkup-an kag ginpunggan ni alyas Nene ang asawa rason nga nakadalagan paguwa sa balay ang iya ka-relasyon.
Nangin emosyunal ang mister kag indi halos makapati nga matood gali ang mga nabatian nga estorya apang bangud tuman sini ka palangga si alyas Nene nahimo pa niya ini nga patawaron.
Suno sa mister nga indi niya gusto nga maguba ang ila pamilya kag indi niya gusto nga ma-experience sang ila anak nga magdaku nga wala sang tatay, apang indi sini malimtan nga sang makaisa nahimo siya nga luiban sang asawa.
