PONTEVEDRA, CAPIZ – Patay ang isa ka mister matapos naghikog sa sulod sang ila balay sa isa ka barangay sa banwa sang Pontevedra, Capiz.
Ang wala na ginhingadlan nga biktima ang naga-edad sang 50 anyos.
Suno kay barangay secretary Edwin Basulgan, ginpadulungan sang iya hinablos ang biktima para kuntani hagadon nga magpamahaw apang naabtan ini nga wala na sang kabuhi nga nakabitay sa ila nga balayan.
Matapos gintundaan si Basulgan sang bayaw sang biktima natuhoy sa natabo, gilayon ini nga nagpangayo sang responde sa mga kapulisan.
Gindala pa sa Bailan District Hospital ang biktima apang wala na ini masalbar.
Sa pagpangusisa sang Bombo Radyo nahibaluan nga kaupod sang biktima nga naga-estar sa amo nga balay ang iya hinipo nga anak kag iya apo bangud kapin duha ka bulan na nga nagatrabaho sa luwas sang pungsod ang iya nga misis.
Apang sang gab-i nga ginapahayag naghikog ang biktima, naga-isahanon lamang ini bangud gindala sang iya anak ang iya nga apo agud didto magkatulog sa ugangan sini.
Ginapahayag nga yara sa idalom sang impluwensiya sang makahulubog nga ilimnon ang biktima sang gin-utas ang iya kaugalingon nga kabuhi bangud nag-inom pa ini kaupod ang iban nila nga kasilingan.
Padayon naman ang imbestigasyon sang mga otoridad agud mahibaluan ang madalom nga rason sang biktima sa pag-utas sa iya kabuhi.
