ROXAS CITY – Patay ang isa ka mister matapos nakuryente samtang nagakaayo sang atop sang simbahan sa Sitio Luyo, Barangay Culasi, Roxas City.
Ginkilala ang biktima nga si Cleofe Cervantes, 56 anyos, residente sang nasambit man nga lugar.
Suno sa tiayon sang biktima, nagakaayo ang iya bana sang atop sang simbahan kag nagapulpog ini gamit ang martilyo.
Ginpahayag sini nga iya pa nga ginsinggitan ang bana nga maghalong bangud may yara sang live-wire.
Apang nasaksihan gid sini ang aksidente nga pagka-uyat sang iya bana sa live-wire kag ini ang nakuryente.
Madasig naman nga naka-responde sa lugar ang mga katapo sang Bureau of Fire Protection – Roxas City Fire Station matapos sila makabaton sang impormasyon natuhoy sa nasambit nga insidente.
Suno kay City Fire Marshall Chief Inspector Rowel Limjuco, pag-abot nila sa lugar, nagahapa na ang biktima sa ibabaw sang atop.
Sang ginpalapitan ang lawas sang biktima, nakit-an nga may mga gaob kag samad na ini sa iya nga dughan.
Gintinguhaan pa sang mga nagresponde nga katapo sang BFP nga ma-revive ang biktima apang wala na ini matabangan.
