ROXAS CITY – Padayon nga ginabulong sa ospital ang isa ka 34-anyos nga persona matapos nga ginaalegar ginlabo sang iya bayaw sa Barangay Batabat, Maayon, Capiz.
Nag-angkon sang pilas sa tudlo kag kamot ang biktima nga si Randolf Dellomos matapos nga ginaalegar ginlabo sang suspek nga bayaw man sini nga si Joebert Dordas 27-anyos sang amo nga lugar.
Sandig sa imbestigasyon sang Maayon Municipal Police Station nga nagainom ang duha ka nasambit nga persona sa panimalay sang amo nga suspek bangud ginapahayag nga nabaton na nila ang ilayuda nga P6,000 gikan sa Social Amelioration Program (SAP) sang Department of Social Welfare and Developmet (DSW).
Apang, wala ginalaoman nga may yara sang nagluntad nga pagbinaisay sa tunga sang biktima kag suspek matapos nga nag-inaway man ang ila duha sini ka mga kabataan.
Nag-angkon sang komprontasyon kag indi pag-intiendihanay ang magtimbang nga bahin rason nga hinali na lamang nga nagkuha sang binangon ukon sanduko ang suspek kag ginaalegar nga ginlabo ang nasambit nga biktima.
Bangud diri, nag-angkon sang pilas ang biktima nga gilayon naman gindala sa Bailan District Hospital agud dapatan sang nagakaigo nga pagbulong.
Padayon naman ang ginapatigayon nga imbestigasyon kag hot pursuit operation sang mga kapulisan agud madakpan ang suspek nga madasig nakapalagyo matapos ang insidente.
Mahibaluan nga yara sa idalom sang impluwensya sang makahulubog nga ilimnon ang duha sang natabo ang insidente.
