ROXAS CITY-Pilason ang 37-anyos nga lalaki matapos nga ginaalegar nga gintiro sang anay security guard sa Sito Perara, Barangay Poblacion Sapian Capiz.
Ginkilala ang biktima nga si Eduardo Parohinog residente sang amo man nga lugar.
Sandig sa inisyal nga imbestigasyon sang Sapian Municipal Police Station nagaguwa nga gingubat kag ginhangkat sang inaway sang suspek nga si Quirico Gerapista, 40-anyos, anay security guard kag residente sang nasambit nga lugar, ang biktima samtang nagainom sa balay ni Ronel Varnal.
Gintinguhaan pa nga tambagan sang mga himata sang biktima ang suspek apang sang ginalapitan ini sang biktima agud komprontahon, hinali sini nga gintiro ang biktima gamit ang ginaalegar 12 gauge shotgun.
Nag-angkon sang pilas sa tiyan kag sa nawala nga butkon ang biktima nga gilayon nga gindala sa Capiz Emmanuel Hospital kag padayon nga ginabulong.
Samtang ang suspek ang madasig nga nagpalagyo matapos ang nasambit nga insidente.
