Dead on arrival ang 26-anyos nga miyembro sang Philippine Army matapos nga maaksidente sa Purok Sambag, Brgy Libas, banwa sang Isabela, Negros Occidental, kaina alas- 6:20 sang aga.
Ginkilala ang amo nga biktima kay Private First Class Dexter F. Castañares, 26-anyos, tumandok sang Brgy Maindang, Cuartero Capiz apang temporaryo ini nga nagapuyo sa Barangay Sikatuna banwa sang Isabela nga naasign ini sa 62nd infantry battalion.
Suno sa pahayag nga samtang ginasubay ang dalanon sakay ang iya nga motorsiklo papauli gikan sa trabaho si Private first class Castañares sang nahitabo ang wala ginalauman nga insidente.
Nagtabok ang duha ka menor de edad sa pedestrian kag ulihi na ini nanotisyaran ni Castañares. Gilayon ini nga nagpreno apang wala na sini nakontrol ang pagmaneho bangod sa dulhogon ang dalanon.
Nagtabog ini kag nag-agom sang pilas sa ulo kag natuo nga tiil.
Samtang, kasubong man nga nag-angkon sang mga pilas ang duha ka menor de edad.
Madasig naman nga ginpadangat sa ospital ang duha ka menor de edad kag si Castañares, apang gindeklarar nga dead on arrival si Private first class Castañares.
