Ginpahamtang sang mga rebelde si Mohammad al-Bashir nga magadumala temporaryo sa transitional government sang Syria.
Suno sa mga rebelde nga sila karon ang may kontrol sa gobyerno sang Syria, magaserbe si al-Bashir nga bag-o nga Syrian prime minister samtang nagapadayon ang pagbalik sini sa normal.
Pagapangunahan ni al-Bashir ang transitory government tubtob March 1, 2025.
Si al-Bashir ang nagpanguna sa Syrian Salvation Government (SSG) sa Idlib province antes nila dalayon nga ginpatigayon ang dose ka adlaw nga opensiba para pahalinon sa pwesto si Bashar al-Assad.
Ang ginpamunuan sini nga SSG ang nagapanguna nga nagbulig sa mga rebelde para masakop ang nagkalain-lain nga mga syudad sa Syria.
Una na nga nasakop sang mga ini ang syudad sang Aleppo, tubtob sa dalayon man nga ginsakop ang iban pa nga dalagkuan nga syudad, ilabi na ang capital nga Damascus.
Samtang, nagpromisa naman si Abu Mohammed al-Jolani, nga kadungan sang pagbabalik-normal sang Syria, pagalagson sa gihapon sini ang mga anay nga senior officials sa administrasyon sang ginsipa nga presidente agud mapanabat sa ginaalegar ginhimo nila nga war crimes, pag-turture, kag iban pa nga krimen sa mga pumuluyo sang Syria.
Si al-Jolani ang Islamist leader nga nagpanguna sa lapnagon nga opensiba nga nangin dalan agud dalayon nga mapahalin sa pwesto si al-Assad.
