Ginpanindugan sang Provincial Administrator sang probinsya sang Capiz nga ginahimo lang sini ang iya trabaho bilang administrador nga protektahan ang pumuluyo sang Capiz.
Ini matapos ang pagpaka-malaot sa iya sang mga supporters sang FM Radio Station nga Baskog Radyo nga gina-alegar pagpahingabot ang rason sa likod sang pagpakakas sang antenna sang amo nga radio station.
Sa interview sang Bombo Radyo kay Provincial Administrator Dr. Edwin Chinel Monares, ginklaro sini nga wala ginkakas ang antenna sang nasambit nga radio station bangud sa nagluntad nga komosyon, kabaliskaran sa ginaalegar ginapalapta nga kabutigan sang mga empleyado sang amo nga istasyon.
Dugang pa niya nga wala maka-pangalan sa National Telecommunication Commission (NTC) ang nasambit nga radio station.
“SA LEGALIDAD”
Suno kay Monares nga Pebrero 2020 sang ginsuguran sini ang imbestigasyon matapos nga ila natalupangdan nga wala malakip sa kontrata sang istasyon ang pag patindog sang antenna.
Dugang pa sang administrador nga makabig nga delikado ang pagpatindog sang antenna bangud:
1.) ang atop sang Capiz Business Center ang wala gin desenyo nga patindugan sang antenna
2.) Masami gina bagyo diri sa Probinsiya
3.) Malapit sa Airport (kinahanglan ang CAAP permit bangud sa posible pag interfere sang Signal)
SA “PAMERSONAL”:
“Dati rin po ako sa isang Radio Station, kaya alam ko ang Pamantayan o ethics ng isang anchorman, Hindi po totoo yan”
Suno diri nga may yara sang “due process” ang layi kag ginatugyan niya na lamang ini.
Dugang pa sini nga wala sang kamatuoran nga naga-pamersonal ini sa amo nga isyu.
SA PAG PAHALIN SA IYA:
“Wala po akong magagawa dyan kung yan ang gusto nila, Sanay na po ako, pero hindi naman pwedeng umalis nalang ako, ako din ang kakasuhan niyan”
Wala sang problema sa luyag magpahalin sa iya bilang administrador, apang luyag niya lang nga kun magpatigayon sang protesta ang mga supporters sang amo nga istasyon, siguraduhon lang nga magsunod sa strict health minimum protocols sang DOH subong nga may pandemya.
Dugang pa niya nga si Capiz Governor Esteban Evan Nonoy Contreras gid lamang ang sarang nga makapahalin sa iya sa pwesto.
SA MGA EMPLEYADO SANG RADIO STATION:
“Wala po akong personal na galit sa kanila. Trabaho lang po, walang personalan”
Ginklaro ni Monares nga trabaho lang ang iya ginabuhat kag wala ini nagapamersonal apisar ano pa nga pagpakamalaot ang ginahaboy sa iya bangud nga ang iya responsibilidad amo ang pangalagaan ang mga pumuluyo kag manggad sang probinsiya sang Capiz.
Sa katapusan, suno diri nga ang kamatuoran ang magaguha kag ang iya ginahimo ang naka-sandig sa layi.
Sandig sa ginkasugtanan sang magtimbang nga kampo nga maga-comply sang naga-kaigo nga dokyumento sa sulod sang pito (7) ka adlaw nga plaso ang istasyon sang Baskog Radyo.
Mahibaluan nga nagtuad ang Station Manager sang amo nga istasyon nga boluntaryo nila nga paga-kakason ang ila antenna kun mapaslawan sila sa pag-comply sang mga dokyumento nga kinahanglan sang gobyerno probinsiyal sa pagpadayon sang ila operasyon.
