ROXAS CITY – May lima ka adlaw nga plaSo nga ginhatag ang Securities and Exchange Commission (SEC) sa pamunuan sang Chiyuto Creative Wealth Document Facilitation Services (CCWDFS) para makasumiter sang verified motion to lift sa ginpapanaug nga cease and desist order (CDO) sang ahensiya sang nagligad nga Miyerkules.
Ginpahayag ni Atty. Russel Ildesa, director sang SEC Region VI, pananglitan mapaslawan ang pamunuan sang Double your money investment scheme nga makasumiter sang motion to lift order sa commission en banc, mahimo na nga mangin permanente ang CDO.
Kun ini ang matabo, wala na sang tsansa nga maka-operate pa ang CCWDFS ni Patroceño Don Chiyuto.
Ginklaro man ni Atty. Ildesa nga indi mahapos magkuha sang secondary license sa SEC, bangud magluwas nga maidid ang proseso nga ginapatuman sang ahensiya, madamo nga mga rekisitos ang gina-require para sa mga negosyante nga luyag mag-operate sang legal ang ila nga kompaniya.
Kinahanglan nga viable ang negosyo ukon madugay na ang negosyo.
Apang sa sahi sang negosyo ni Chiyuto nga isa ka tuig pa lamang ang operasyon, indi makapasiguro si Ildesa kun mahatagan ini sang secondary permit sang SEC.
Samtang sa ginasiling plano sang loyal supporters kag investors sang double your money investment scheme ni Chiyuto nga magapalab-ot sila sang manifesto sa SEC agud bawion ang cease and desist oder nga ginpapanaug sang ahensiya, suno kay Ildesa nga wala man ini sang problema, bangud manifesto lamang ini.
