Ginmalas ang isa ka motornapper matapos nga naaksidente samtang sakay sa ginmotornap nga motorsiklo sa Barangay Bungsuan, banwa sang Dumarao.
Nag-angkon sang gasgas sa nawong kag pila ka parte sang lawas ang suspek nga si Ryan Abian sang Concepcion, Iloilo.
Ba-se sa imbestigasyon sang Dumarao PNP, naka-park ang isa ka motorsiklo nga ginapanag-iyahan ni Elizabeth Cabison 48-anyos sa guha sang iya puluy-an sang ginmotornap ni Abian.
Matapos nabatian ni Cabison ang pag-andar sang iya nga motorsiklo, gilayon nila ini nga ginlagas sang mga himata.
Una nga nagdiretso sa direksyon sa Barangay Dacuton ang ginmotornap nga motorsiklo, apang sang nakita nga ginalagas nag-U-turn sa Dumarao proper.
Apang pag-abot sa Barangay Bungsuan aksidente sini nga nabungguan ang isa ka naka-park nga motorsiklo rason nga natumba kag nadakpan.
Gilayon nga gindala sa ospital sa Iloilo ang suspek sa diin ginpaidalum ini sa hospital arrest.
Samtang desidido ang tag-iya sang motorsiklo nga ginmotornap ni Abian nga pasakaan sang panumbungon ang suspek.
