Nagpanugyan si Miss Universe Philippines (MUPH) National Director Ariella “Ara” Arida sa mga kandidata sang Miss Universe Philippines 2026 pageant nga indi pagpabay-an ang pagtulog sa tunga sang masako nga schedule.
Suno kay Ara nga ang nagakaigo nga pagtulog importante sa pagpabilin sang ikaayong lawas, pagnubo sang stress, kag pagpaguwa sang kinaugali nga katahum sang tagsa ka kandidata.
Ang “glow” nga ginapangita sa isa ka beauty queen indi lang makuha sa makeup kundi nagasugod sa nagakaigo nga pag-atipan sa lawas, ilabi na sa pagtulog.
Gin-ako man ni Ara nga sang lamharon pa siya kag aktibo nga nagapasakop sa mga pageant, wala niya ginahatagan sang daku nga importansya ang pagtulog bangud nagapati ini nga bastante na ang iya enerhiya.
Bangod sini, luyag niya nga ang mga delegates sa subong ang magtuon kag himuon nga prayoridad ang pagpahuway samtang temprano pa.
Sa subong, masako ang 51 ka mga kandidata sa nagkalain-lain nga aktibidad kaangay sang swimsuit competition sa Boracay kag pagbisita sa nagkalain-lain nga lugar, lakip na ang Misamis Occidental.
Samtang, ang coronation night sang MUPH 2026 ang natalana sa Mayo 1 sa isa ka bantog nga mall sa syudad sang Pasay, sa diin ang outgoing queen nga si Ahtisa Manalo ang magapasa sang iya korona sa masunod nga magadaug.
