May kabug-usan nga 314,785 nga kaso sang dengue ang nabalhag sa pungsod sang Oktubre sang tuig nga ini, suno sa Department of Health.
Apang, gin-mensyunar sang DOH nga nagnubo ang kaso sang dengue, kun sa diin sang Setyembre 29 tubtob Oktubre 12 may pagnubo sang eight percent.
Suno pa sa ahensya, nagnubo ang numero sang mga napatay subong nga tuig ikumparar sa kapareho nga tion sang nakaligad nga tuig.
Samtang, bangud sa tig-ululan kag mataas nga tiyansa sang pagdamo sang mga lamok, ginsiguro sang DOH sa publiko nga nakahanda ang ila mga pasilidad para diri.
Agud malikawan ang mga kaso sang dengue, padayon ang pagpakig-angut sang ahensya sa mga local government units kun sa diin ginganyat sini ang publiko nga magsuksok sang mga bayo nga mas makatakop sa panit ukon maggamit sang mga mosquito repellant.
Ginpanugyaanan man ni Health Secretary Ted Herbosa ang publiko nga magpadulong sa pinakamalapit nga health facility para magpakonsulta kun nakabatyag sang sintomas sang dengue.
