SIGMA, CAPIZ- Yara sa kabug-usan 238 ka mga indibidwal ang nagbayolar sa Municipal Ordinance nga ginapatuman sa banwa sang Sigma sa diin amo ang Speed Limit Ordinance sa sulod sang isa ka semana, umpisa Hunyo 1 tubtob 8, 2025.
Sa interview sang Bombo Radyo kay Honorable Dante Rizal Eslabon, Municipal Mayor sang Sigma, ginpahayag nga base sa datos nga nakuha sang Public Order and Safety Unit (POSU) nagikan sa tatlo ka clusters nga ginakalakipan sang cluster 1 barangay Paria-an, cluster 2 barangay Dayhagon, kag cluster 3 barangay Tawog, narekord ang amo nga numero sang mga indibidwal nga nagbayolar sa ginapatuman nga ordinansa.
Dugang pa sini nga sandig sa datos nga narekord, halos wala sang pumuluyo sang Sigma ang nakabayolar sa amo nga ordinansa kag suno kay Mayor Eslabon, kalabanan nga naka-bayolar mga umalagi.
Sa pihak nga bahin, gin-athag sang alkalde nga tatlo ka bulan antes pa man ipatuman ang nasambit nga ordinansa, gin-anunsyo na ini nila sa publiko ang pagsulundan sang amo nga patakaran kag wala na suno sila sang may mahimo sa pila ka mga indibidwal nga nagapahayag nga wala sila kabalo sang amo nga ordinansa bangud suno sa iya ginhimo na nila ang tanan agud mapalab-ot sa tagsa-tagsa ang pagpatuman sang amo nga ordinansa.
Nagpahayag pa ang alkalde may kaangtanan sa isa ka ceres bus driver kun sa diin nagpabutyag ini sang iya nga kalain buot bangud ticketan kuntani ini sang Public Order and Safety Unit (POSU) sa sala nga overspeeding kun sa diin suno sa iya wala sya kahibalo nga may speed limit ordinance sa banwa sang Sigma kag nagpanawagan ini nga kuntani hatagan sang tyansa ang mga wala pa nakahibalo.
Suno sa alkalde, obligasyon na sang kompanya sang mga ceres bus nga ipalab-ot sa tagsa ka mga drivers sini ang kun ano man nga mga layi ukon ordinansa ang ginapatuman sa tagsa ka mga kabanwahan ilabi nagid sa banwa sang Sigma, casual man ukon regular nga driver, kinahanglan suno sa iya nga pahibal-on sang kompanya agud malikawan nga mamultahan ang mga ini kag dugang pa sang alkalde, wala sila sang kakulangan, bangud nga may mga signages sila nga ginpahamtang sa higad sang karsada kag visible para sa mga umalagi agud nga amo ang sundon samtang ginasubay ang dalanon sang Sigma.
Mensahe naman sang alkalde sa mga umalagi sa ila nga banwa nga sundon ang ginapatuman nila nga ordinansa agud nga makalikaw sa posible nga mga penalidad kag para sa mga baguhan sa lugar kinahanglan suno sa iya nga magpahinay-hinay gid sa pagpadalagan bangud nga indi mo suno ina kabisado ang dalan kag may posible nga may magluntad nga insidente kun sa diin amo ini ang katuyuan sang nasambit nga ordinansa nga pahagan-haganon.
With a report from Bombo Francis Binas
