ROXAS CITY – Indi pa sa karon matumod ang lugar nga ginpadulungan ukon ginpanaguan sang 18-anyos nga soltero nga nagpositibo sa COVID-19.
Ginpahayag ni Punong Barangay Lorilee Aguirre sang Barangay 5, sining syudad matapos gin-imporma sang crisis center nga positibo sa COVID-19 ang nagpalagyo nga si alyas Santos nga residente sang nasambit nga barangay gilayon sini nga ginpatawag ang ginikanan kag gin-estorya.
Ginpanginwala sang iloy ni alyas Santos nga nakapauli sa ila balay ang iya anak kag nagkita sila.
Apang ginhatag sini ang address kag cellphone numbers sang mga indibidwal nga posible kadtuan sang iya anak apang sang ginpadulungan wala ang presensiya ni Santos.
Gintuad ni Kapitan Aguirre nga yara sa crisis center si Santos matapos ginpa-kostodiya bangud sa masami pagtuga sini sang problema sa ila barangay kasubong na gid lamang sa pending case sini nga pagpangawat
Nahibaluan nga ginpaidalum sa swab test sa hortus botanicus ang mga youth offenders nga yara sa sulod sang facilidad matapos nga nakaangkon sang close contact sa isa ka nagpositibo sa amo nga balatian.
Matapos ginpaidalum sa swab test, naglisensiya si Santos nga magapangihi.
Apang sang nakakita sang tsansa ini ang nagdalagan palayo sa lugar kag nagpalagyo.
May pila ka mga impormasyon nga nabaton si Kapital Aguirre nga nagkadto si Santos sa Barangay Punta Tabuc sa diin nagatenir ang nobya.
May report man nga nasiplatan ini kaupod ang nobya sa Barangay Culasi.
Nagpakitluoy ang opisyal sa pamilya ni Santos nga isugid kun diin mahimo makita ang ila himata bangud indi lamang isyu sang pagpangawat ang gina-estoryahan diri kundi nabutang sa risgo ang komunidad bangud positibo sa COVID-19 si Santos.
Bangud ginaalegar nakapauli si Santos sa ila balay antes ini nagpanago ginpakamaayo sang konseho sang Barangay 5 nga ipaidalum sa home quarantine ang pamilya ni Santos sa diin wala sila ginapahanugutan nga makaguha kag ginapabantayan sa mga tanod.
Nagpanawagan man ini sa publiko pananglitan makita si Santos nga magpakig-angut lamang sa ila sa Barangay 5, agud ila makadtuan ang lugar nga ginapanaguan sini.
Samtang naka high alert sa karon ang COVID-19 Task Force matapos nga nagpositibo sa amo nga balatian si Santos nga wala pa makita tobtob sa karon.
Ginpahayag ni COVID-19 Task Force Commander Ronald Amigo nga ginpaidalum sa swab test ang mga youth offenders nga ginakostodiya sang crisis center.
Naglisensiya si Santos sa mga frontliners nga magapangihi, apang nagpalagyo sang makakita sang kahigayunan.
