Isa ka 17-anyos nga dalagita ang nasapwan sa hilamon nga bahin sang isa ka reclamation area sa Bacolod City nga nakagapos ang iya mga kamot kag wala na sang panapton ang iya idalom.
Suno sa mga Pulis, nakit-an sang isa ka tricycle driver ang bangkay sa Barangay 12.
Dugang pa, ulihi nga nakit-an nga buhi ang biktima sang Martes sang ini ang nagguwa sa ila balay apang wala na nakabalik.
Suno kay Police Captain Francis Depasucat, hepe sang Police Station 1, ginkilala sang mga himata ang bangkay sang biktima nga ipaidalom sa autopsy.
Ginpahayag may nakit-an man nga pilas sa lawas kag butkon sang biktima.
Usisaon man sang kapulisan ang mga CCTV cameras sa lugar nga mahimo makabulig sa imbestigasyon agud mahibaluan kon sin-o ang mga tawo nga ulihi nga nakita upod sa biktima.
Samtang, ginkondenar naman ni Bacolod City Mayor Greg Gasataya ang nasambit nga krimen kag nagtanyag sang P100,000 nga padya sa sin-o man nga makakilala sa naghimo sini.
