Naglab-ot na sa halos 500 nga mga baboy ang nakumpiskar sang gobyerno sa tunga sang kampanya batuk sa African Swine Fever (ASF).
Ini matapos liwat nga makadakop sa Mindanao Avenue ang mga operatiba sang checkpoint sang nagtingub nga pwersa sang Department of Agriculture (DA), Bureau of Animal Industry (BAI), Philippine National Police (PNP) kag Quezon City Local Government Unit sang shipment nga may dala 70 nga mga baboy kung sa diin nagpositibo sa ASF.
Sa pahayag sang DFA, sa pag-inspeksyon sang mga nakatalana sa checkpoint natukiban nga nagpakita sang clinical signs ukon sintomas sang ASF ang nasambit nga mga baboy kag pila sa mga ini napatay kabangdanan nga madasig ang pagkumpiskar sa mga ini.
Mahibaluan nga ginpatigayon ang pag-condemn sa mga baboy matapos magpositibo sa ginpatigayon nga test.
Kalakip sa mga ginpangkumpiskar sang mga otoridad ang pila ka mga meat products matapos mahibaluan nga ginpeke ang Certificates of Meat Inspection (COMI) kag tampered ang petsa sang mga manufacturing sini.
Kung nakalusot sa checkpoints ang mga baboy gintestingan nga palusuton, pagadal-on ang mga ini sa Ilocos, Pangasinan, Tarlac, Bulacan kag Cagayan, nga magahatag sang delikado sa iban pa nga mga baboy.
Bangud sini, ginhatagan sang pagtamod ni Agriculture Assistant Secretary for Swine and Poultry, Dr. Constante Palabrica ang importansya sang mga checkpoint nga nagabantay 24/7 agud siguraduhon nga indi maglapta ang ASF sa rehiyon.
Magluwas sa mga baboy, kalakip sa mga ginacheck sa checkpoint ang mga manok agud malikawan naman ang paglapta sang Highly Pathogenic Avian Influenza (HPAI) ukon bird flu.
