ROXAS CITY – May ginahimo na nga tikang ang National Bureau of Investigation – Capiz (NBI) natuhoy sa kaso sang pagpang-scam sa isa ka senior citizen kun sa diin nakapadala ini sang masobra P2-Million sa nagpakilala nga si Willie Revillame kag mga ginapahayag staff sang amo nga personalidad.
Sa interview sang Bombo Radyo kay NBI-Capiz Officer Agent John Katipunan, ginpahayag sini nga matapos mag-file sang complaint sa ila talatapan ang amo nga senior citizen, gilayon nila nga gin-trace ang mga numero kag location sang mga scammer.
Dugang pa sini nga nagapatigayon sila sang record check sa mga pangalan sang ginpadal-an sang kwarta sang nasambit nga senior citizen.
Pahayag pa sini nga padayon man ang ila pag-identify sa mga persona agud mapasakaan sang nagakaigo nga panumbungon.
Suno kay Katipunan nga grupo ang nagpang-scam sa 64-anyos nga tigulang nga ginatawag nga “boiler room” sa diin ginakabug-usan suno diri sang anom (6) tubtob walo (8) ka persona nga nagahimo sang text blast.
Naghatag naman ini sang panugyan sa tanan nga kun mahimo indi mag-entartain sa mga tawo nga indi kilala mapa-text man ukon tawag kag online. Indi man suno diri mag-click sang mga link nga gina-send sa text, chat ukon email.
