ROXAS CITY – Generally peaceful kag nangin madinalag-on ang eleksyon sang nanligad nga Mayo 9 kun sa din wala sang nabalhag nga kinagamo sa probinsya sang Capiz.
Sa interview sang Bombo Radyo kay Atty. Rosauro Dantis, Deputy sang NBI-Capiz, suno diri madamo sang impormasyon nga nabaton ang ila talapatan nga may yara sang vote buying nga nagkahinabo apang wala sang nagakaigo nga ebidensya nga maipakita.
Suno diri, antes magsugod ang eleksyon naghiwat ini sang presscon agud e-anunsyar nga handa sila nga respondehan ang mga impormasyon may kaangtangan sa pagpamakal sang boto kag kun may ipabalhag nga presensya sang mga armado nga mga indibidwal.
Ginpahayag ni Dantis nga nagpahamtang man ini sang mga intelligence operatives sa nagkalain-lain nga munisipalidad, pananglitan may yara sang impormasyon nga mabaton natuhoy sa vote buying, paga-padulungan ini kag pagaberikahon ini sang operatiba.
Gintuad man sang opisyal nga limitado ang ila hulag bangud sa resolution 10743 kun sa din kinahanglan pa sang order nagikan sa Comelec antes mag-akto sa impormasyon nga nabaton, ilabi na kun ang vote buying ang nagakahinabo sa sulod sang isa ka puluy-an.
Dugang pa sini apisar, tapos na ang eleksyon, mahimo sa gihapon magpadulong sa talapatan sang NBI kun luyag magpabalhag sang reklamo naangut sa vote buying.
Kinahanglan magpresentar sang ebidensya kasubong sang pictures, videos kag handa maghatag sang statement agud maduso ang kaso sa indibidwal ukon grupo kag mahatagan ini sang nagakaigo nga disposisyon.
Panugyan ni Dantis sa mga pumuluyo, nga wala sang may ginapili nga pagaserbisyuhan ang NBI kag bukas ang ila talapatan sa ano man nga kaso ukon mga concerns nga luyag mahibaluan.
