Nagpagwa sang subpoena ang National Bureau of Investigation (NBI) sa mga celebrity nga sanday Michelle Dee, Rhian Ramos kag beauty queen nga si Samantha Panlilio.
Ini ang ginkumpirmar sang legal counsel ni Dee nga si Atty. Maggie Abraham-Garduque sa isa ka pahayag.
Ang nasambit nga subpoena ang may kaangtanan sa pagpangkastigo kag illegal detainment sang tatlo sa anay driver ni Ramos nga si alyas Totoy sang Enero 17 tubtub 19, mga akusasyon nga una na nga ginpanginwala sang tatlo.
Nahibaluan nga nabaton na sang law office sang legal team ni Dee ang subpoena nga gin-isyu sang NBI sang nagligad nga semana bangud nag-file sila sang entry of appearance agud nga ang tanan nga notice kay Michelle Dee ang direkta nga ipadala sa ila opisina.
Ginpasalig naman sang abogado nga tumanon sang iya kliyente ang gin-issue nga subpoena agud pamatian ang ila bahin may kaangtanan sa nasambit nga isyu.
Nagalaum man ang kampo ni Michelle Dee nga sa ulihi makuha nila ang hustisya.
Sa subong, wala pa sang may ginpagwa nga pahayag ang kampo nanday Ramos kag Panlilio kasunod sang ginpaguwa nga subpoena.
