CUARTERO CAPIZ – Kulba ang nabatyagan sang isa ka negosyante, matapos ginapahayag ginhold-up sa Sitio Cabu-an, Barangay Agdahon, Cuartero, Capiz.
Ginkilala ang biktima kay alyas “Raian”, 42-anyos kag residente sang Barangay Carataya sa amu nga banwa.
Samtang ang ginatudlo suspek amu ang duha ka persona nga wala pa makilan-an kung sa diin ang driver ang nakasuksok sang itom nga bonnet, jacket, short kag pula nga helmet samtang ang backrider sini ang nakasuksok naman sang itom nga jacket, short kag helmet.
Sa impormasyon nga nakuha sang Bombo Radyo nagikan sa Cuartero Municipal Police Station, ginpahayag sini nga samtang ginasubay sang biktima ang dalan sakay sang iya salakyan kag padulong kuntani sa proper sang hinali lamang ini nga gintambangan sang duha ka mga suspek kung sa diin ang backrider sini ang nagtaya sang .45 caliber nga armas luthang kag nagdeklarar nga hold up.
Bangud sini, nataban sang mga suspek ang P54,000.00 nga kwarta kag madasig nga nagpalagyo sakay ang Bajaj nga motorsiklo.
Sa karun, nagapadayon ang hot pursuit operation sang katapo sang Cuartero MPS batuk sa mga suspetsado.
