ROXAS CITY-Ginpasalig sang talatapan sang National Food Authority ukon NFA- Capiz nga bastante pa ang suplay sang bugas sa pihak sang ginpalawig nga Enchanced Community Quarantine sa probinsya sang Capiz.
Ini ang ginpasalig ni Ms. Herielle Jumagbas, NFA-Capiz Administrator sang mainterview sang Bombo Radyo Roxas.
Suno kay Jumagbas nga indi matabo ang Rice Shortage sa Capiz sa pihak sang ginpalawig nga ECQ bangud kapin sa 159 mil ka sako pa sang bugas ang yara sa bodega sang NFA-Capiz nga ginalauman magalawig tubtob sa 27 diyas.
Gindugang pa ni Jumagbas nga magluwas sa suplay sang NFA, may bastante pa nga suplay ang tagsa ka mga panimalay kag mga commercial rice traders sa merkado kag rice producing province man ang Capiz.
Samtang, ginkumpirmar sang NFA Capiz nga may pila ka mga commercial rice traders ang temporaryo nga nagsarado sa merkado bangud nag-untat man sa pagsuplay ang ila nga talatapan sa diin prayoridad nila ang pagsuplay sa mga LGUs nga ginagamit sa pagpanagtag sa mga relief operations.
