ROXAS CITY – Padayon nga nagapatigayon sang milling operations ang National Food Authority (NFA) – Capiz Branch Office bilang preparasyon para sa provincial rollout sang “Benteng Bigas Meron Na” (BBM Na) program.
Ang “BBM Na” initiative sa Visayas ang una nga ginlunsyar sang Mayo 1 kasunod sang direktiba ni President Ferdinand Marcos Jr. nga himuon nga barato ang bugas para sa mga Filipinos.
Suno kay National Food Authority Acting Branch Manager Andy Ostan, ang NFA amo ang mangin source sang bugas nga ibaligya sa P20/kilo sa mga vulnerable sectors sa idalom sang “Benteng Bigas” program.
Suno kay Ostan, wala pa sang may nabaton nga advice ang NFA Capiz Branch halin sa Food Terminal Incorporated para sa ‘authority to issue rice’ sa mga nagapartisipar nga local government units para sa nasambit nga programa.
Nahibaluan nga ang NFA Capiz ang may yara sang 200,000 bags sang palay stocks sa nagakalain-lain nga warehouses sa diin nalab-ot na ang 47% ukon 142,000 bags sa 300,000-bag palay nga target para sa subong nga tuig.
